Ek gaan vandag begin om ‘n komitee saam te stel. Hulle moet my met alles help. Die eerste taak sal wees om navorsing te doen en dan elke dag voorstelle voor te lê vir blog-skrywes.

Die komitee kan dan ook sommer my werk by die kantoor hanteer, alles by die huis onder beheer hou…. en ek sal agteroorsit en mooi lyk. Ek sal dalk wel self die inskrywings doen, en dalk my telefoon self antwoord……

Kyk, die Klay/Els sage is ook nou al besig om bietjie afgesaagd te raak, MAAR ek moet net hierdie twee juweeltjies met julle deel (Is mens nog onder eed as jy in ‘n hof getuig? Wonder maar net….)

• Me. Jenny Liebenberg het “romanties” in hom belang gestel, terwyl hy “soos elke tweeede man in Suid-Afrika” op die sangeres Patricia Lewis verlief was.
• Volgens Els was Lewis toe die “gewildste vroulike kunstenaar in die land” en hy en Steve Hofmeyr het “meegeding om die eerste plek vir manlike kunstenaars”

Hy praat van Suid-Afrika nê?

Terug by die komitee… Miskien moet ek ‘n kommissie aanstel om te besluit of die komitee nodig is….

Wanneer verander oorboord in OORBOORD gaan?

Niksvermoedende jongman vanaf Oxford gaan kuier vir sy vriend in Londen. Dit is 10 uur in die oggend, hy is bietjie laat, en parkeer sommer op die geelstreep, so 400m van No 10, Downing Straat af. So 16 ure later, toe hy terugkom by sy kar is daar net ‘n uitgebrande wrak.

Die terreurpolisie het besluit om sy kar moer toe te blaas met twee beheerde ontploffings, want hulle het gedink dit kan ‘n moontlike terreuraanval teen die Premier wees… WTF? 400m weg? Jy sal ‘n flippen atoombom moes hê?

Wanneer raak erg, TE erg? Kan julle aan nog sulke voorbeelde dink? Ek moet erken – Ek is ook nie ‘n groot fan van Bybel-Onder-Die-Arm mense nie.

Elke oggend moet ek deur tien-talle e-posse sif, om by die paar (gewoonlik minder as 10%) uit te kom wat eintlik met werk en/of vriende te doen het. Die ander 90% bied my elke wonderlike ding onder die son aan.

Alles van Viagra tot ‘n Rolex…. alles natuurlik baie goed nagemaakte replika’s. Nou wonder ek, jy kan ‘n heel ordenkilike horlosie by ‘n winkel kry vir R1,000. ‘n Regte egte een. Hoekom op aarde wil jy ‘n replika Rolex koop?

En om in die strate rond te loop, getooi met daardie daardie replika Rolexes, Gucci sakke en Nike drafskoene flous jy in elk geval net een persoon…. JOUSELF.

Ons lewe in ‘n plastiek Ken en Barbie wêreld…. want daar moet kopers vir hierdie produkte wees, as hulle aanhou om die e-posse te versprei…. en die Chinese lag al die pad bank toe, want weereens maak hulle geld uit ‘n Westerse swakheid uit.

Eintlik wil ek net meer my gedagtes, en betugting van myself vanmore neersit in geskrewe woorde. Hierdie besluit om op te hou rook, bied definitief nie net die voor die hand liggende gesondheidsvoordele nie, maar laat jou ook bietjies van jouself weer leer ken.

Verdraagsaamheid word opnuut tot heel nuwe vlakke beproef. Ek het vir alle praktiese doeleindes gistermiddag amper in iemand vasgery. Nie per ongeluk nie, maar met opset – want as ek kan wag in die verkeer, kan jy ook sonder om te wil indruk. Punt. Ek het nog altyd so gevoel – maar voel dalk nou net bietjie sterker daaroor. Toe het die man nog die vermetelheid om die vinger vir my te gooi…. gelukkig het ek nie ‘n geweer byderhand gehad nie… ek haal toe maar diep asem, maak die anderkanste venster oop en vra hom toe heel beleefd: “Excuse me, what did you say?” Sy antwoord was toe weereens die vinger, maar hierdie keer gepaardgaande met die vokale uitdrukking van “Fuck you” daarby. Na dat ek weer diep asemgehaal het, het ek hom reguit in die oë gekyk en gesê : “Well done, I am sure the prophet Mohammed will be very proud of what you just did.”

My draadjie is dus kort, baie korter as gewoonlik want die gryp van ‘n sigaret was altyd ‘n manier om stoom af te blaas – die kwade gedagtes te sus.

Voorbeeld 2, kooroefening gisteraand. Nou hierdie sekere oom was vir amper die hele jaar nie daar nie weens siekte. Nou skielik wil hy inspring en in 2 weke gereed wees vir die 29 November Kerskonsert. Onder normale, nikotiengevulde omstandighede sou en die water oor die akkers laat vloei het (want ultimately is dit ‘n kerkkoor)… maar ek moes gisteraand ‘n hele paar keer tot tien, en dan weer terug na een getel het… want ‘n “HOE FOKKEN MOEILIK KAN DIT WEES!” sou nie goed by die kerk afgegaan het nie.

Wat ek wel weet is dat ek moontlik die heel beste tot tien, en dan weer agteruit tot een teller ooit gaan wees…… en ek gaan beter kan diep asemhaal as enige mediteerder…… en vir die beter oorlewing van die mensdom moet niemand my aanraai om ook op te hou drink nie….

Ek het iewers op my kamera ‘n verkeerde opsie gekies met die neem van die foto…. maar tog dink ek dit lyk baie cool en gee dit my so ‘n rustige gevoel.

Ek is in my tweede nikotienvrye dag. My brein voel so bietjie fuzzy, en dit voel of ek die heeltyd dronk is…. maar ek het gelukkig nog niemand aangerand om ‘n sigaret by hulle te steel nie…. So far, so good.

Ok, ek wonder hoekom ons dit nog skryf noem, as ons almal weet dit is deesdae eintlik maar tik.

Die Werf het ‘n skryf kompetisietjie aangekondig, wat sommer vet pret gaan wees.

Ek daag die volgendes uit om deel te neem – En ja, op julle beurt moet julle ook ‘n paar bysleep: Girlie, Rosa, MnrMuller,SamBlixer & PlaasJuppie.

Toe mense, julle is met die hand uitgekies…. Moenie my teleurstel nie…

Ek wonder nog steeds – Oor die skryf en tik ding…….

Die klein voëltjie het pas uitgebroei, en hy verwonder homself al klaar aan die ander wat deur blou lug swiep…. op en af. Op tot waar hulle net ‘n spikkeltjie in die lug is, en dan ‘n duik na onder. Hy wil dit ook doen, Ma en Pa sê wag eers bietjie… maar hy kan nie. Hy skuifel tot op die rand van die nes, maak sy klein vlerkies oop en strek. Die opwinding bruis deur sy are as hy sy oë toeknyp en spring.

Die slag teen die klip vergruis elke beentjie in sy lyfie…. die skok veroorsaak onmiddelike dood. Vrek.

Geduld is ‘n goeie deug om te hê, en as jy nie geduld het nie… een om te probeer ontwikkel. Party dinge is dalk bedoel om bietjie langer te vat, in die strewe na perfeksie.

Management Enjoying a Long Weekend

Ek wonder of ek genoeg verskil in ander (uitgesluit familie en vriende) se lewens maak, dat ek gemis sal word as daar vandag ‘n rooi bus oor my ry?

In Flanders Fields

In Flanders fields the poppies blow
Between the crosses, row on row,
That mark our place; and in the sky
The larks, still bravely singing, fly
Scarce heard amid the guns below.

We are the dead. Short days ago
We lived, felt dawn, saw sunset glow,
Loved, and were loved, and now we lie
In Flanders fields.

Take up our quarrel with the foe:
To you from failing hands we throw
The torch; be yours to hold it high.
If ye break faith with us who die
We shall not sleep, though poppies grow
In Flanders fields.

— Lt.-Col. John McCrae (1872 – 1918)

Op die 11 de uur van die 11 de dag van die 11 de maand is die ooreenkoms onderteken wat die einde van die Eerste Wêreldoorlog beteken het. Ten spyte van die verskriklike lewensverlies, en die duisende poppies wat in die omgedolwe velde opgekom het om as herinnering te dien….. het baie min in amper ‘n eeu verander…….

********

Bloed verkleur die modder tussen bene en arms en ander stukke wat voorheen lewe was en nou as ’n boete dien vir ander se besluite, terwyl die gewere en bomme ’n kakofonie dirigeer oor die eindelose groen velde en nog ’n naam in die lys van tere herinneringe gebeitel word. Stukkies word geskraap en onder eindelose rye spierwit kruise in die omge-oorlogde aarde begrawe. Daar waar die nuwe lente duisende poppies tot aandag gaan roep in kleur so rooi soos veldslagbloed. Die mooi ter gedagtenis aan geskiedenis wat mense was, en soveel meer as name gebeitel in marmer sou kon wees.

 ********

Naskrif: Ek weet nie hoeveel van julle het dalk familie in die twee Wêreldoorloë verloor nie, maar ek kom toe nou vanoggend op hierdie oulike werf af.

My oorlede ouma se eerste man, my twee ooms se pa, is dood in die Tweede Wêreldoorlog. Ek het nog altyd oor hom gewonder, bv. waar hy begrawe is ensovoorts.

Ek vind toe die webwerf van die Commonwealth War Graves Commission. Hulle lys die bykans 1,7 miljoen soldate en ander wat in die twee ooloë beswyk het, hulle range, sterfdatums ens. asook waar die graf is, as dit wel bekend is.

En nou weet ek hy is in die Oologsbegraafplaas in Assissi begrawe. Cool nê!